23 dekabr 2005-ci il tarixdə Dünya Bankı (InfoDev Programı çərçivəsində) tərəfindən maliyyəşdirilən və Sumqayıt şəhər İcra Hakimiyyətinin dəstəyi ilə “InfoTek” İctimai Birliyi tərəfindən həyata keçirilən “Sumqayıt şəhərində Biznes İnkubatorun Yaradılması” layihəsi çərçivəsində Milli Forum keçirilmişdir.
   Layihə Azərbaycanda ilk dəfə olaraq həyata keçirilir. Biznes inkubator - yerli şirkətlərin yeni yarandığı dövrlərdəki inkişafına və rəqabətli mübarizə aparmasına yardım edən bir təşkilatdır. 
   “Sumqayıt şəhərində Biznes İnkubatorun Yaradılması” layihəsi iki mərhələdən ibarətdir: Birinci mərhələ - Planlaşdırma mərhələsi (sentyabr 2004 – dekabr 2005) - Bu mərhələnin əsas məqsədi inkubasiya mühitini müəyyən etmək və yerli şirkətlərin ehtiyaclarını qiymətləndirməkdir. İkinci mərhələ - həyata keçirmə mərhələsi (fevral 2006 - fevral 2007) – bu mərhələdə Biznes İnkubatorun istifadəyə verilməsi və onun xidmətlərinin daxil olmuş şirkətlərə  təqdim edilməsidir.
   Forum iki hissədən ibarət idi: birinci hissə ölkənin orta və kiçik biznesinin və sosial-iqtisadi inkişafında Biznes İnkubatorun rolu. Bu hissədə Sumqayıtda Biznes İnkubatorun Yaradılması konsepsiyası təqdim olundu. İkinci hissə yerli şirkətlərin dünya bazarına çıxmasında biznes inkubatorların rolu adlanırdı. Bu hissədə yerli şirkətlərin xarici bazarlara çixarkən üzləşdikləri problemlər müzakirə olundu. Forum çərçivəsində həmçinin Sumqayıt şirkətlərinin istehsal etdikləri məhsul və xidmətlərin sərgisi keçirilmişdir.
   Forumda İqtisadi İnkişaf Nazirliyin Aparatının Rəhbəri cənab Samir Vəliyev, AtaLizinq Şirkətinin Rəhbəri cənab Ceyhun Məmmədbəyli, Ata Bankın Sumqayıt şəhər filialının rəhbəri cənab Çinqiz Qurbanov, Sumqayıt şəhərinin iş adamları və ictimaiyyətinin nümayəndələri iştirak edirdilər. Əvvəlcə giriş sözü ilə “InfoTek” İctimai Birliyinin sədri xanım Məlahət Kazımova çıxış etdi. O, Forumun iştirakçılarına biznes incubatorunun yaradılmasının özəl sektor üçün vacibliyindən və biznes mühitinin təkmilləşdirilməsində böyük rolundan danışdı. Sonra İqtisadi İnkişaf Nazirliyin Aparatının Rəhbəri cənab Samir Vəliyev çıxış etdi. Sonra isə “Sumqayıt şəhərində Biznes İnkubatorun Yaradılması” layihəsinin meneceri cənab Anar Mahmudov çıxış edərək Layihənin və Biznes İnkubatora olan tələbatın hesabatının nəticələrinin təqdimatını keçirdi.
   Çıxişlardan sonra Sumqayıt şirkətlərinin məhsul və xidmətləri ixrac etmək potensialını nəzərdən keçirmək məqsədi ilə 10 yerli şirkətin təqdimetmə mərasimi keçirildi.    
  Sonda Milli Forumun təşkilatçıları iştirakcıların çoxsaylı suallarına cavab verdilər.